RONDOM DIE KERK. . .
Wat, sê die kerk, het gebeur? Wat is hul weergawe van die
"geskiedenis?" Wat is hul
storie?
Dit is die kerk se leerstelling dat God, deur te spreek, alles wat bestaan,
in sewe dae geskep het. Hulle sê dat Hy
hierdie wêreld en die mensdom gemaak het weens 'n inherente karaktereienskap
van Hom, nl. liefde, wat Hom tot daardie skeppingsdaad gedwing het. Die aarde, die mens en die totale skepping is
Sy handewerk wat Hy min of meer ses duisend jaar gelede in sewe letterlike dae
begin en voltooi het.
God het dan ook gesien dat alles wat Hy gemaak het, goed was.
Behalwe met Lucifer.
Lucifer het in die hemel, teen God, in opstand gekom, sê hulle, en hy is
toe uitgewerp uit die hemel op die aarde.
Toe die mens tydens die sewe dae van skepping gemaak is, is hulle deur
Lucifer verlei, wat toe bekend geraak het as die ou slang of die duiwel. As
gevolg daarvan, het die mens ongehoorsaam geword en het 'n toestand van sonde,
nie alleen op aarde nie, maar ook in die heelal, ontstaan.
Sedertdien is die mensdom met die erfsonde belas en is hulle, as gevolg van
wat Adam en Eva gedoen het, die ewige dood skuldig. Alles wat in die lewe 'n probleem is, vind
daar in Eden sy oorsprong - moord, dwelms, pornografie, oorlog, inflasie, egbreuk,
diefstal, siekte - ja alles wat verkeerd is, het ontstaan as gevolg van die eet
van 'n vrug waarmee Lucifer vir Eva, die eerste vrou op aarde, verlei het. So sê die kerk.
Maar God het gelukkig nog altyd 'n geheime plan gehad, sê hulle verder,
naamlik dat Hy Sy Seun, Jesus, na die aarde sou stuur om vir die mens 'n verlossing
van daardie sonde- probleem te bewerkstellig.
Om daardie Seun van Hom hier op aarde te kry, sou verg dat God 'n aardse
meisie moes gebruik, dat Hy haar met Sy Heilige Saad sou bevrug sodat sy die
kind vir nege maande sou dra en op die regte tyd sou baar. God se keuse, sê die
kerk vir ons, was 'n Joodse meisie genaamd Maria, 'n meisie wat reeds aan ene
Josef die skrynwerker verloof was. En so
kom die God-mens Jesus na die aarde om vir die mens se sonde aan 'n kruis te
sterf sodat ons ná hierdie lewe vir ewig in die hemel kan gaan woon. Daar is ewige saligheid en ewige blydskap
sonder al die probleme van die sonde.
Dit is die oplossing van die probleem en beloning vir die mens wat glo
in Jesus, die Seun van God, sê die kerk.
Mense wat daardie proses van redding aanneem, wat deel word van die
"verloste skare", word as "die kerk" beskryf, of word
"die bruid van die Lam" genoem.
Dit is hulle wat hulle soos "wyse maagde" gereed maak vir die
wederkoms van Jesus en dit word van hulle gesê dat hulle "maagde" is
en die "kerk" word as "maagdelik rein" beskryf - nie omdat
almal in die kerk letterlike maagde is nie, maar omdat hulle in 'n "nuwe
lewe" begin het en veronderstel is om by die "reinheid" van die
volle waarheid te staan. So kan daardie
beelde in verstaanbare taal verklaar word.
Dit is die kerk se weergawe van ontstaan en bestaan. (sien Openbaring 12
en 14).
Eers was die wêreld volmaak, sê hulle.
Toe het ongehoorsaamheid en sonde (die "sondeval") ingetree wat
onvolmaaktheid, lyding en die dood voortgebring het.
Daarna het 'n lang proses van heling gevolg, die herstel van die sondige
onvolmaaktheid terug na volmaaktheid met behulp van Jesus.
Wanneer dit afgehandel is, kom die ewige vrede in die paradys en die opstanding
vir hulle wat "glo".
Die mens wat dít nie glo nie, sê die kerk, sal verlore gaan, want so 'n mens
sal nie die "opstanding uit die dood" ervaar nie en sal nie ná die
dood vir ewig in die paradys voortleef nie.
Christene sê dat mense van hul sinne beroof moet wees as hulle daardie interpretasie
van die geskiedenis nie glo nie.
"Dit is so logies, so eenvoudig, so oulik, so wonderlik", sê
hulle. Kan dit anders? Hierdie lewe is swaar, sê hulle, en baie
slegte dinge gebeur en byna almal ly onder die las van die "sonde",
maar hierna - hierna wag daar tog iets goeds vir die mens - die paradys en die
ewige lewe in die hemel.
"Glo net", sê hulle.
Dit is die een helfte van die storie.
DIE ANDER HELFTE
Die res van die storie, sê die kerk vir ons,
is dat "satan", die "ou slang", die " duiwel", oftewel "Lucifer", die gevalle "bedekkende gerub", en
'n menigte ander engele wat hom in sy rebellie gevolg het, almal tot hierdie
aarde ingeperk is totdat hulle op die laaste dag, die dag van oordeel in die
hel se vure sal brand. Vir hulle is daar
geen redding of verlossing nie en die dood van Jesus help hulle en hul leier,
Lucifer, nie. Baie mense volg Lucifer en
hulle word in die Bybel beskryf as sondaars en onheiliges.
Al daardie "afvalliges" trek dan saam en vorm 'n magsblok teen
God. Een beeld wat gebruik word om
daardie afvallige magsblok te beskryf is dié van 'n hoer. In Openbaring 17 word 'n groot hoer en haar
baie hoer dogters beskryf. Die moeder
verlei al wat koning en magtige persoon op aarde is en versamel hul mag en geld
agter haar in 'n aardse opstand teen God en die waarheid. So sit hierdie ma met dogters agter 'n bose
aardse orde teen al wat goed en heilig is.
So word dit in daardie profesie uiteengesit. (Volgens Calvyn se Institusie en die
ander hervormers se menings).
Net soos hulle wat gered gaan word, nie
letterlike maagde is nie, net so is hulle wat nie gered gaan word nie, ook nie
letterlik hoere nie - dit is Bybelse beeldspraak wat gebruik word om daardie
twee groepe te beskryf:
-
hulle wat nie die reine waarheid nastreef nie is "hoere"
(Open. 13 en 17) en
-
hulle wat die reine waarheid nastreef, is "maagde".
(Matt.
25:1, Open. 12 en 14).
Dit is kortliks die kerk se storie.
Ons weet eintlik reeds dat daar net twee
groepe mense op aarde is - goeie mense en slegtes – en dat die slegte mense 'n meerderheid
is en dat die goeies deur hulle oorheers word.
Dit is algemeen bekend en word deur talle filosowe en denkers in
soortgelyke terme beskryf.
MAAGDE EN HOERE
Die een groep is dus geestelike
"maagde" terwyl die ander geestelike "hoere" (afvallig) is.
Wat onderskei hierdie twee groepe van
mekaar?
Kwansuis 'n liefde vir die waarheid.
Hulle wat die waarheid navolg en daarvoor
lewe, word "maagde" genoem en sal gered word, maar hulle wat nie die
waarheid liefhet nie, word "hoere" en "hoerkinders" genoem
en kan nooit "gered" word nie.
Dit is min of meer wat die Bybel en die kerke verkondig, met inagneming
van die interpretasieverskille wat daar tussen die onderskeie
kerkgenootskappe bestaan.
Dit volg op tekste soos:
"Want
elkeen wat kwaad doen, haat die lig en kom nie na die lig nie, dat sy werke nie
bestraf mag word nie. Maar hy wat die waarheid
doen, kom na die lig, sodat sy werke geopenbaar
kan word,
dat hulle in God gedoen is." (Johannes 3:20 en 21)
"Maar
daar kom 'n uur en dit is nou, wanneer die ware aanbidders die Vader in gees
en waarheid sal aanbid; want die Vader soek ook mense wat Hom só
aanbid." (Johannes 4:23)
"En
julle sal die waarheid ken, en die waarheid sal
julle vrymaak." (Johannes 8:32)
"Heilig
hulle in die waarheid. U
woord is die waarheid." (Johannes 17:17)
"Julle
het die duiwel as vader, en die begeertes van julle vader wil julle doen. Hy was 'n mensemoordenaar van die begin af en
staan nie in die waarheid nie, omdat daar in
hom geen waarheid is nie.
Wanneer hy leuentaal praat, praat hy uit sy eie, omdat hy 'n leuenaar is
en die vader daarvan." (Johannes 8:44)
(Die klem by hierdie teksverse is deur
hierdie skrywer aangebring).
Neem ook kennis van die beskrywing in Romeine
1:24 tot 33 van mense wat die waarheid verwerp en hoe dit tot hoereerdery (en
eintlik geestelike hoereerdery) lei:
24 Daarom
het God hulle ook in die begeerlikhede van hulle harte oorgegee aan
onreinheid, om hulle liggame onder
mekaar te onteer-
25 hulle wat die waarheid van God verruil het
vir die leuen en die skepsel vereer en gedien het bo die Skepper wat geprys
moet word tot in ewigheid. Amen.
26 Daarom het God hulle oorgegee aan skandelike
hartstogte, want hulle vroue het die natuurlike verkeer verander in dié wat
teen die natuur is;
27 en net so het ook die manne die natuurlike
verkeer met die vrou laat vaar en in hulle wellus teenoor mekaar ontbrand:
manne het met manne skandelikheid bedrywe en in hulleself die noodwendige
vergelding van hulle dwaling ontvang.
28 En omdat hulle dit nie die moeite werd geag
het om God in erkentenis te hou nie, het God hulle oorgegee aan 'n slegte
gesindheid, om te doen wat nie betaam nie:
29 hulle is vervul met allerhande
ongeregtigheid, hoerery, boosheid, hebsug, ondeug; vol nydigheid, moord, twis,
bedrog, kwaadaardigheid;
30 nuusdraers, kwaadsprekers, haters van God,
geweldenaars, trotsaards, grootpraters, uitvinders van slegte dinge, ongehoorsaam
aan die ouers;
31 onverstandig, ontrou, sonder natuurlike
liefde, onversoenlik, onbarmhartig,
32 mense wat - al ken hulle die verordening van
God goed, dat die wat sulke dinge doen, die dood verdien - dié dinge nie alleen
self doen nie, maar ook hulle goedkeuring skenk aan die wat dit doen.
33 Terwyl hulle voorgee dat hulle wys is, het
hulle dwaas geword.
NET TWEE GROEPE MENSE
Die kerke vertel ons dus dat daar op aarde net
twee groepe mense is:
1) hulle
wat die ewige waarheid glo en wat as "maagdelik rein" beskryf word en
so gegroepeer word. Hierdie groepering
gaan, volgens die kerk, hierna die ewige lewe en die hemelse paradys
beërwe. Die kerk sê dit is maklik om te
verstaan dat 'n rein God Hom nie met die "hoerery", of te wel, die
verval en onreinheid van hierdie lewe ophou nie en dus belang het by die
redding van hulle wat rein is soos Hy;
2) hulle
wat nie die "ewige waarheid" aanneem nie, wat as "maagdelik onrein"
beskryf word en wat so gegroepeer word, wat oneerlik is en graag leuens wil
verkondig, hoereerders en afvalliges wat nie waardig is om gered te word nie en
wat na die verderf vaar waar hulle vir ewig sal brand en pyniging as gevolg van
hulle sonde sal ly.
Dit is baie kortliks wat die kerk te sê het .
. .
Teologies gesproke het die gedagte van
"hoereerdery" in die Bybel eerstens en hoofsaaklik te doen met geestelike afvalligheid, 'n
val weg van die reine, Ewige waarheid af.
Dit het, behalwe waar die konteks dit aandui,
nie in die eerste plek te doen met alledaagse, letterlike egbreuk nie, iets
waaraan byna elke mens op aarde skuldig is en as dit die maatstaf is, kan
niemand meer "gered" word nie aangesien byna almal wat hierdie
gedeelte lees, tog seker voor hul huwelik "gevry" het, en in streng
Bybelse terme, daarom eintlik skuldig is aan vleeslike oortreding.
Nee, die Bybel is eerder doenig met die
figuurlike oortreding, die geestelike egbreuk van mense wat beweer dat hulle die
Skepper in die eerste plek liefhet, maar daagliks besig is om Mammon of enige
van etlike ander "afgode" te dien, en ook om die leuen meer lief te
hê as die waarheid.
Dus kan daar maklik saamgestem word - daar is
net twee groepe mense op aarde - hulle wat die waarheid liefhet en hulle wat eerder
die leuen verkies.
WAARHEID EN MISLEIDING
Die kerk sê dat
hulle die enigste waarheid het, nl. die evangelie, die blye nuus, opgesom in
die paar paragrawe hierbo. Hul volgelinge is dus "maagde" omdat hulle die
waarheid volg.
Volgens die kerk is
almal wat nie in die Bybel glo nie, wat aan ander religieë behoort, eintlik dan
deel van die groep wat "hoereer", en die kerk waarsku dan teen hierdie ander groepe, hul skrywers en
denkers.
Maar daar is ander denkers
en skrywers wat meen dat die onderskeid nie so maklik is nie, dat daar 'n heel
ander interpretasie is.
Hierdie skrywe sal
weer kyk na die kerk se storie en na die indeling van maagde en hoere en sal
soek na die ware profete en kyk of daar nie 'n klomp voëlverskrikkers iewers
versteek is nie.
Elkeen wat die goeie wil doen, en wat wéét
dat hulle die goeie wil doen, sal beslis aansluiting vind by die volgende
hoofstukke.
Truth
should be hard won.
The
truth is only recognized as the truth after all the lies are told
and
discounted. You won’t appreciate the
truth or even begin
to
fathom it unless you take a tortuous road to find it.
Nelson de Mille
No comments:
Post a Comment